N-a
saqwantès-annêyes, qwand lès bouhons tchantît
èt qu'lès steûles si k'boutît po trover 'ne plèce è cîr,
acosté dè p'tit banc la wice qu’i coûrt li ri,
i- n-aveût-st-on bon Diu
clawé so ine creû d'pîre.
Li prétins dispièrtéve sès blankès mågriyètes
qui corît avinèyes åtoû dè crucifis.
dès cagnèssès tchårnales lî tressît 'ne gloriète
èt lès måvas vints d'mås’ vinît s'î acropi.
Li solo dès-ostés adjèrcîve inte lès cohes
sès blancs r'djèts èminnés qui sèrît leûs påpîres
èt ståréve a sès pîds come dès-ofrandes à r'dohe
sès låmes di doûce tcholeûr, sès clignètes di loumîre.
L'arîre-såhon d'adon ni lèyîve rin å rés,
di sès mèyès coleûrs èle lî féve in- åté.
L'îviér èt sès frudeûrs ni djowéve nin èl piéce :
tot èsteût racovrou, tot èsteût -st-èwalpé.
C'èsteût i-n-a lontins, fwért lon d'vins mès sov'nîrs
